StadsWeb

Stad meer dan droag brôôd

Content

StadsWeb
Noe mit al dat mooije weer ken de zwembroek of zwempak weer uit de kast. Je ken noe terecht op hut Stadse strandje, vroegur gienge we op hut gors of op hut hoad zwemme.
opmaak
Tis weer tiet om te gaen zwemme

Noe mit al dat mooije weer ken de zwembroek of zwempak weer uit de kast.Je ken noe terecht op hut Stadse strandje, vroegur gienge we op hut gors of op hut hoad zwemme.

Toen de sluus dur nog niet was kon je an hut einde van de kaaje un brugetje over in zo kwam je op het gors terecht. An de lienkerkant was het kikkerbadje waer je terecht kon as je niet kon zwemmen, je kon dur laape tot an hut hoad. De zwemmers konde op het hoad terecht. Je had daer wel last van straming as hut waeter op kwam, die was soms zo groot dat hut haest niet meugeluk was om tegun de straam op te zwemme.

Zwemme most je je eige mar anleere je kon niet op zwemles. Dur wiere dan aak allerlei middeltjes gebruik om dat zwemmen oendur de knie te kriegen van un autoband tot un blikke bus. As je dur of viel dan most je wel krabbele om an de kante te kommen, zo ha de meeste leere zwemme, althans ze konde hut hood boven waeter houwe.

In de zeumer, bie mooi weer wilde je graeg gaen zwemme, mar as je nog niet kon zwemme mocht je niet alleen naer hut gors toe. Je vadur of moedur hadde geen tiet om mee te gaen, die waare druk mit waark op hut land of in hut huushouwen, As je tuus zei dat Ome Wullem op hut gors was dan mocht je vaek wel gaen zwemme. Ome Wullem was tur wel, mar hie kon geen slag zwemme, dus as je wat overkwam had je daer aak niet veul an.
Gewaepend mit un ouwe dekun om op te laagen in un flesse waeter was je de hele middag oendur de pannen. Je moedur gaf nog wel de boodschap mee dat je most luustere naer Ome Wullum.

Dat ter nooit wat gebeurde kwam omdat iedereen luusterde naer Ome Wullem, of voorzichtig was daer mok ofbleuve.

Allemeale mar weer de groete van Jan van 't hoekie