StadsWeb

Stad meer dan droag brôôd

Content

StadsWeb
We staen dur niet meer bie stil mar de televisie is noe un schemurlamp geworre. Van sogguns vroeg tot saevens laet staet dat dieng an. Soms is tur tussen de reclames nog wat te zien aak.
opmaak
Televisie kieke

We staen dur niet meer bie stil mar de televisie is noe un schemurlamp geworre. Van sogguns vroeg tot saevens laet staet dat dieng an. Soms is tur tussen de reclames nog wat te zien aak. Wielle hadde zoon kassie niet, mar mochte op weunsdagmiddag bie Teun Niep naer hut kinderuurtje gaen kieke.

Je gieng dan netjus vraege of je daer mocht kieke. Dur waare aak are maasun waer je mocht kieke, mar bie Teun Niep was hut drukste. We stoende dan al vroeg genog bie de wienkel te wachten want je wilde niet te leat komme. We zatte dan mit zoon twintig kindurs in de kaemur, dat zal geweest ha in 1955 dienk ik. Je dee je schoenen netjus uut in dan zat je mit zun allen op de groend. Wat me bie gebleve is, is de poppekast van Dappere Dodo, dat begon altiet mit un versie, dat gien zo:

Jongens, meisjes, kiek noe goed
Wat die dapp're Dodo doet
't Is un jongen met veul pit
Waar geen greintje kwaed in zit
Hie is julle dikke vrind
die je heus wel aerdig vindt
Daad'lijk staat hie voor je neus
Kiek, daer is tie, echte waar, heus

Je had Dappere Dodo die beleefde toen heel wat avonturen. Zun vriend hiete Kees, dan had je aak nog opa Buiswater, in juffrouw Vulpen. Dat maas hield van dichte, ze vulde altiet een zin van andere an mit un rimende zin. Dan had je aak nog de kapitein die zun schip hiete: De Schele Zeemeermin.
As hut verhaeltje ofgelaape was, hut duurde mar zoon tien menuten was tur weer un versie:

Jongens, meisjes, wat un pech
Dapp're Dodo gaet noe weg
Maar hie komt een volgend keer
met zun aventuren weer
En hie trekt dan blie van zin
weer de wieje waereld in
Kind'ren let dan allun op
Anders hei je heus un strop.

Op hut leste kwam dan de omroepster Tante Hannie die zwaaide dan mit twee handen naer oens. Iedereen voend het jammer dat het dan al ofgelaape was, mar volgende weeke mochte we weer kieke, daer keek je naer uut. Noe ken je un hele dag naer dat kassie kieke in dan zie je nog niks, toch?

Allemeale mar weer de groete van Jan van 't hoekie