De kachel an maeke.
Hut wordt weer naejaer, tiet om de kachel an te maeken. Noe is ut simpel de termosstaat wat haagur in tis zo waarm in huus. Vroerug kwam dur meer bie kieke.
Nae de zeumer wier de kachel weer in orde gemaekt on te kenne brande. Hut kachelpuupje wier weer in de schouwe gezet, in niet te vergeten hut rooje pepier wier van voor de miekaruutjes gehaeld, dat was in hut voorjaer dur voor sier voorgezet. Wielle hadde tuus un kolekachel die most je elku ogund an maeke dat was un heel gedoe kenk wel zaagu. Hut was aak nog us steen koud in huus as je uut je bed kwam. In de zeumer waare de kolen besteld in gebrocht, in de zeumer waare die goekaaper, dus hut koolehok zat vol. Bie oens gieng dur zoon mud of twaaluf kolun in.
Van te voorun deje kachelhoutjes hakke, die stoende dan in un mande in hut schuurtje.
De kolebus most ik volscheppe mit de koleschop, in dan gewaepund mit un krante, wat kachelhoutjus in de peteroliebus op naer hut zwarte moenster. De kachel uutpooke in de aslaa deje we leeggooije op hut pad achtur. Je kon dan hut deurtje voorin de kachel ope doen, daer gieng de krante in, de kachelhoutjes dur bovun op in dan un lekkere scheut peterolie. Noe dan stoenk ut al as un boemsum in huus, mit un lucifer deje we de krante ansteeke, mit die peterolie brande die as un tierelier. As de kachelhoutjes lekkur brande gienge de kolun dur op. Dat gaf al gauw veul raakontwikkelieng, mar dat gieng as je mazzel had deur de puupe naer buiten, as je pech had stoend in un agunblik de kaemur vol mit raak. In nae zoon haluf uurtje wier hut dan behaegeluk in huus.
Noe laap je naer de termostaat in draai je die wat haagur in tis voor de bakker.
Allemeale mar weer de groete van Jan van ât hoekie.