Naer de kleuterschoolu
De kleuterschoolu op Stad die hietende gelaaf ik âPrinses Marijkeâ die is pas gebouwd begin zestigur jaerun. Mar waer mot je dan naer toe as je de leeftiet heit in dur is geen kleuterschoolu?
Noe dan kon je tuus bleuve of naer den Bommul, daer hadde ze wel un kleuterschoolu. Ik gieng dus naer den Bommul met de bus, die kwam nog echt helemaele ovur het durp. Hie reed ovur de Meulendiek, dan ovur den Achterdiek in dan naer de Voorstraete in hie stopte bie Piet de Kapper voor de deure. As de maasun in of uitgestapt waare, gieng die deur de Nieuwstraete zo vlak langs de wienkel van van Neuren (noe E-markt) den bocht om bie den wittun trap in zo weer ovur den Achterdiek in dun Meulendiek naer den Bommel of Meneerse. Toen kon je eigeluk overal in of uit stappe, as je je hand op stak dan stopte de bussjefeur In as je in de bus zat dan liep je naer voorun in vroeg an de sjefeur of tie daer of daer wil stoppe, noe dat deed tie sjefeur. Omdat mun moedur dur hand opstak as de bus langs kwam konk dus voor de deure instappe.
Ik gieng dan un heelun dag van huus, dat was mar niks. Ik had un blauw roend blikke brôôdtrommeltje bie me, dat kon je mit un hiengsel roend je nikke hange. Ik kreeg dan twee of drie boterhammen mee in un boterhamzakkie. Daer zat dan eige gemaekte sjem op of stroopvet (dus geen droag brôôd), dat voenk harstikke lekkur As drienkun kreeg ik un klein flessie melluk mee. Dur zaate beslist geen snoepies in mun trommeltie dat kon niet leije in die tiet. Op dun Bommul stopte de bus op den diek voor de kleuterschoole, de juffrouw kwam je daer ophaele in nam je mee naer schoole die beneeje an den diek stoend. Om drie ure brogt de juffrouw me weer bie de bus, in zo konk weer mee naer Stad, de sjefeur stopte dan voor de deure. Zo gieng ik as vuf jarige de wieje waereld in.
De volgunde keer zalk vertelle hoe mun slaepkamur dur uut zag.
Allemeale de groete van Jan van ât hoekie.